Ka heke a Te Ao-kapurangi i ngā kāwai rangatira o Rangiwewehi me Tapuika.  He mea kāhaki ia e tētehi rangatira o Ngāpuhi, e Te Wera Hauraki i a ia e tamariki tonu ana, ā, ka noho ki Pēwhairangi i Te Tai Tokerau.

Nā wai, nā wai ka tū te puehu, ā, ka hoki a Ngāpuhi ki roto o Te Arawa ki te patu i a Tūhourangi me Ngāti Whakaue.  

I te rongotanga atu ka whakatika ētehi o Te Arawa ki Mokoia e haumaru ai tā rātau noho i te wā o te pakanga.  Ahakoa kua moe kē a Te Ao-kapurangi i a Te Wera Hauraki, i māharahara tonu ia ki ōna uri o Te Arawa. Nāna a Ngāpuhi i whakamahara kia kaua e patu i ōna uri o Ngāti Rangiwewehi me Tapuika inā rā karekau ō rātau take i taua raru rā, heoi, nā tā rātau noho i te takiwā rā ka whai wāhi tonu ki te patunga.

I whaiwhakaarohia te tono a Te Ao-kapurangi e ngā rangatira o Ngāpuhi, nō reira, i tukua a Te Ao ki te whakamōhio atu ki ōna uri kia wehe atu i Mokoia kei patua.  Ka whakatata atu a Te Ao ki Mokoia, ā, ka kitea a Hikairo, heoi, kāore ia i pīrangi ki te whakarere i ōna huānga, nō reira, ka noho tonu.

I tana kiriwera ka tono anō a Te Ao ki tōna rangatira, ki a Hongi Hika kia whaiwhakaaro nui atu ki ō Te Ao uri.  Nā reira i toko ake ai te whakaaro i a Hongi kia tohua te hunga ka hikoi ki raro i a Te Ao-kapurangi i te wā o te pakanga.  

Nā te atamai o Te Ao-kapurangi i pikihia ai te whare o Tamatekapua ka karanga atu ai ia ki ōna uri kia tomokia te whare e ora ai rātau.  He maha tonu i uru ki roto i te whare. I mōhio ngā toa o Ngāpuhi kua tau kē te whakaritenga rā e Te Ao rāua ko Hongi, nō reira, i tukuna tonuhia rātau kia ora.

I hau te rongo o Te Ao-kapurangi, ā, kua maumaharatia ia i tāna mahi nui i ora ai te tini o Te Arawa i taua rā.  He wahine māia, he wahine whaiwhakaaro nui, he wahine aroha ki ōna uri i puta ai te kōrero rongonui,  "Anō ko te whare whawhao a Te Ao-kapurangi" ka whakapuakina i te wā e kī ana te whare i te tini makiu.